-महेन्द्र पौडेल
ऊ अरुणाको काखमा बस्यो, फटाफट उनको छातीतिर हात लगायो र स्तन निकालेर चुस्न थाल्यो । उसको ध्यान केवल चुस्नमै मस्त छ उनी भने एकतमासले टोलाइन र एउटा ममतामयी नारी र आफ्ना मातृत्वको कर्तव्य पूरा गरेजस्तै अनि सन्तोषको श्वास फेरीन । वात्साल्य र ममतामयीबाट दुवै चरम भए । अरुणा अर्थात मेरी श्रीमती र उनको र मेरो सानो छोरो ।
हाम्रो सम्बन्ध विच्छेदको प्रसङ्ग चल्दै थियो, मैले उनलाई कालीमाटीको घर दिने प्रस्ताव गरेँ उनले स्वीकारिन र हामी माइती नेपालको प्राङ्गगणमा भेला भएका थियौं । त्यसो त मेरा तीनबटा घर छदैं थिए, त्यो सबै मैले युरोप आएपछि मात्र बनाउन सकेको हुँ । युरोपमा करिव १० वर्ष विताइसके र त्यसैको उपज मैले तीनवटा घर बनाए । बिगत ५ वर्षदेखि नेपाल आउने जाने क्रम चलीरह्यो यसैबीचमा अरुणा र मेरोबीच अर्को छोरा जन्मन पुगेको थियो । उही उनको काखमा बस्ने छोरो ।
मैले उनलाई युरोप बोलाउन प्रयत्न गरेँ उनले इन्कार गरीन र भनिन् अव दुइवर्ष पर्खनुहोस् जेठोले प्रवेशिका दिएपछि आउँला नत्र उसको पढाइ बिग्रन्छ । छोराहरुको पढाई र घर परिवारको चिन्ताले अरुणालाई व्यस्त बनाइरह्यो भने यता मलाई युरोपमा कामको चक्कर सनिवार र आइतवारको छुट्टीले एकतमासले भारी बनाउथ्यो ।
